Monday, November 9, 2015

ගිලෙන නැවෙන් පනින මීයෝ

මූඩිය හැරි සෝඩා බෝතලයක සැර මෙන් වියැකී යන යහපාලන ආණ්ඩුවේ ජනප්‍රිය බව අපවත්වී වදාල සෝභිත හිමියන්ගේ නාමයෙන්වත් ගොඩගනු නොහැකිය. ආණ්ඩුව ස්ථාවර කරගැනීමේ අරමුණින් අටවාගත් ඊනියා ජාතික ආණ්ඩු සංකල්පයම අද එහි අස්ථාවර බවට හේතුව වී ඇත. ජනතාවට බලාපොරොත්තු දිය හැකි ජන නායකයෙකුද එහි නැත. එක්සත් ජාතික පාක්‍ෂිකයින් රනිල් වික්‍රමසිංහ සතු යැයි සිතන විදේශ සම්බන්ධතා හා ආර්ථිකය පිළිබඳ විශේෂඥ දැනුමින්වත් රනිල් වික්‍රමසිංහට හපන්කම් පෙන්වන්නට හැකිවී නැත. ඊට හේතුවක් ඇත. රනිල් වික්‍රමසිංහගේ සමත්කම් ඔහුගේ ස්වාමීන්වන බටහිර රාජ්‍යයන්ගේ සමත්කමට සාපේක්‍ෂය. අද රනිල් කරන්නේ ඇමෙරිකාවේ වහල් සමයේ ගෙවහලුන් කල කාරයයමය. ගෙයි වැඩකල වහලා ස්වාමියාට හිතවත්ව සිටමින් කොයි වෙලේ හෝ නිදහස් වෙන්නට බලාසිටි වත්තේ වැඩකල වහලාට හයිකාරකම් දැක්වීය. අගමැතිතුමා පමණක් නොව මුලු ආණ්ඩුවම අද අධිරාජ්‍යවාදීන්ගේ උවමණාව පිට මෙරට වැසියන්ගේ උවමණාවන් සහ සිතැඟිවලට විරුද්ධව ක්‍රියාකරමින් සිටියි.

නමුත් රනිල් වික්‍රමසිංහගේ ස්වාමීන් අද එතරම් බලවත් නැත. දැන් දැන් බටහිරුන්ගේ ආර්ථික ශක්තිය ක්‍රමයෙන් බිඳ වැටෙමින් පවතියි. පොදුවේ යුදෙව් ක්‍රිස්තියානි සංස්කෘතික හා දේශපාලන ශක්තියද ඉදිරි වසර පණහ තුල ක්‍රමයෙන් බිඳ වැටෙනු ඇත. ස්වාමීන්ට බැරිකොට  රනිල් වික්‍රමසිංහට හපන්කම් දැක්විය නොහැකිය. රනිල් වික්‍රමසිංහලා අනතුරු හැඟවූ ආර්ථික සම්බාධක අද නිල නොවන ලෙස මෙරටට පනවා ඇත්තේ බටහිරුන් නොව චීනයය. බටහිර රාජ්‍යයන් පවා මිතුරුකම් පැවැත්වීමට වලිකන චීනය මිතුරුව තබා ගැනීමට මේ රජය අසමත්වී ඇත්තේ ස්වාමීන්ගෙන් වැරදි ලෙස ආරෝපණය කරගත් උද්ච්ඡකමක් නිසා විය යුතුය. 


ඒ අතර ජනාධිපතිවරයාද ආණ්ඩුව තුල තමන්ගේ බල කේන්ද්‍රයක් තනා ගැනීමට සටනක් කරමින් සිටින බව පෙනෙයි. විධායක ජනපතිවුවද මෛත්‍රීපාල සිරිසේනට මේ ආණ්ඩුව තුල කල හැක්කේ සීමිත දේචල්ය. ඒ යහපාලන ක්‍රමවේදයේ යම් ගුණයක් නිසා නොව ආණ්ඩුව තුල බල තුලණයක් වී නොමැතිකම නිසාය. මේ ආකාර විවිධ හේතු නිසා ආණ්ඩුව ස්ථාවර නැත. අස්ථාවර ආණ්ඩුවකට ජනතාවගේ ස්වාධිපත්‍යය පිළිබඳ වගකීමක් ගත නොහැකිය. මෙවැනි දේශපාලන සංදර්භයක්තුල විපක්‍ෂයේ කාරය භාරය විය යුත්තේ ජනතාවගේ ස්වාධිපත්‍යය සුරැකීමය. එය ඉටු කල හැකි විපක්‍ෂයක් අද අපට නැත. එය ගොඩනැඟිය යුතුය. 


නමුත් ජනතා ස්වාධිපත්‍යය වෙනුවෙන් පෙනී සිටින විපක්‍ෂයක් ගොඩනැඟීමට සුදුසුකම් ඇත්තේ කාටද?

නැවක් ගිලෙනවිට මුලින්ම දොට්ට පනින්නේ එහි සිටි මීයන් බව කියැවෙයි. යහපාලනයට එක්වූ විවිධාකාර මීයන් අද ඉන් පනින්නට යත්ත දරන බව පෙනේ. ඒ අතර පර්ලිමේන්තුව තුල මැති ඇමතිවරුද ඉන් පිටත එන්ජීඕ ගැත්තන් සහ ඊනියා විදුවතුන්ද සිටිති. පනින්නට නොහැකිව ආණ්ඩුව තුල සිරවී සිටින්නේ යහපාලනයෙන් තමන්ට යමක් කමක් කරගත් සාමාන්‍යය දේශපාලණ ක්‍රියාකාරීන්ය.  


මහින්ද රාජපක්‍ෂ දේශපාලනයෙන් ඉවත් කිරීම සඳහාවූ ව්‍යාපාරයේ විවිධ පාරශව සිටියහ. සමහරක් මෛත්‍රීවාදීන්වූ අතර තව සමහරක් රනිල්වාදීන්වූහ. දෙගොල්ලන්ම මහින්ද විරෝධීවූහ. ඔවුහු සෘජුව හෝ වක්‍රව සිංහල බෞද්ධ විරෝධීවූහ. යහපාලන නැවෙන් පනින මීයෝ මේ කාණ්ඩ දෙකෙහිම සිටිති. මේ මීයෝ නොබෝ දිනකින්ම තමන්ට දේශපාලන බලයක් ගොඩනඟාගනිමින් ඊනියා විපක්‍ෂයක් ලෙස ජනතාව ඇන්ඳීමට සූදානම්වනු ඇත.
මීයන්ගේ දේශපාලනය අළුයම ලූ කෙළ පිඩක් සේ ඉවත දැමිය යුතුය. මීට මාස කිහිපයකට පෙර මොවුන් කවුදැයි ජනතාව විසින් ඉතා පැහැදිලිව හඳුනාගෙන සිටියේය. ඒ මතකය ගිලිහී යාමට ඉඩ නොදිය යුතුය.

මීයන්ට මෙරට ජනතාවගේ ස්වාධිපත්‍යය වෙනුවෙන් පෙනී සිටීමට උවමණාවක් හෝ සුදුසු කමක් නැත. 


වත්මන් රජය බලයට ගෙන ආවේත් පවත්වාගෙන යන්නේත් ඉංදියානු-බටහිර දේශපාලන බල මඟිනි. එහි අරමුණු ඉටු කරගැනීම සඳහා මෙරට ස්ථාවර රජයක් පැවතිය යුතුය. මේ විදෙස් බලවේගයට මෛත්‍රීපාල සිරිසේන සමඟවත් රනිල් වික්‍රමසිංහ සමඟවත් විශේෂ ඇයි හොඳැයියක් නැත. ඔවුන්
රනිල් සහ මෛත්‍රී යනු තමන් විසින් අධ්‍යක්‍ෂණය කරන දේශපාලන රංගනයක නළුවන් දෙදෙනක් පමණි. තමන්ට අවැසි දේශපාලන ඉලක්කවලට මේ ආණ්ඩුව සමඟ යා නොහැකි යැයි වැටහෙන විට ඉංදියානු-බටහිර දේශපාලන බලවේග රනිල් සහ මෛත්‍රී ලොප් කිරීමට දෙවරක් නොසිතනු ඇත. නමුත් ඔවුන්ට විකල්පයක් අවශ්‍යයය. 

යහපාලන නැවෙන් පනින මීයන් උත්සාහ කරනු ඇත්තේ රනිල් හෝ මෛත්‍රී වෙනුවට හෝ ඒ දෙදෙනාම වෙනුවට හෝ තමන් සුදුසු යැයි විදෙස් බලවේග වලට ඒත්තු ගැන්වීමටය. ඒ හරහා ඉංදියාවේ සහ ඇමෙරිකාවේ හිත දිනා ගැනීමටය. හිත දිනාගෙන බලයට ඒමටය. එපමණින්ම මීයන්ට බලය ලබා ගත හැකිද යන්න ප්‍රශ්ණයක් වන්නේ ගෝලීය දේශපාලන වාතාවරණය වෙනස් වෙමින් පවතින බැවිනි. කෙසේ නමුත් මීයන්ට කල හැක්කේ ඉංදියාවේ සහ ඇමෙරිකාවේ පිහිට පැතීම පමණි. නමුත් ඊට කලින් මීයෝ ජනතාව දිනාගත යුතුය. (නැත්නම් විදෙස් බලවේග ඔවුන් සැලකිල්ලට ගන්නේ නැත). ඒ සඳහා ඔවුන් සැබෑ විපක්‍ෂය ලෙස පෙනී සිටිමින් ජනතාව ඇන්ඳීමට උත්සාහ කරනු ඇත. මීයන්ගේ දේශපාලනය හඳුනාගනිමු.

2 comments:

  1. Yahapanaya is, in fact, yet another project by the Vatican in its march towards recreating the Roman Empire. But it is doomed to be a huge failure as its main camp-the USA supplying foot-soldiers to the modern day empire building is crumbling. Its end is near!

    Most of the world's problems are created by the Christian Church. This has been a historical reality. What has been happening in the Middle East in which most of the countries are being Balkanzed is a grand strategy by the Church

    ReplyDelete
  2. මචෝ තව අවුරුදු දෙකකට පස්සේ මේ ලිපිය නැවත කියවලා බලපන් යහපාලනයේ වෙනස.

    ReplyDelete