Tuesday, September 29, 2015

ජීනීවා කෝළම

අගමැතිතුමාට අනුව බටහිර රටවල් මෙරටට ආර්ථික සම්බාධක නොපනවන්නේ වත්මන් රජය විසින් කරන ලද කිසියම් දෙයක් නිසාය. එය එසේ නම් ඊනියා මානව හිමිකම් කොමිසමේ ක්‍රියාකාරිත්වය ගැන නිශ්චිතවම යමක් කිව හැකිය. එනම් මේ කොමිසම හරහා බටහිර රජයන් විසින් පසුගිය රජයට ප්‍රබල බලපෑමක් කර තිබිනි. ඉහත කොමිසමෙන් මෙරටට කිසිම තර්ජනයක් නොතිබුන බවක් මැතිවරණ සමයේදී යහපාලනවාදීන් විසින් පෙන්නුවේ ජනතාව රැවටීමටය. ඒ බොරු මෙන්ම වෙනත් බොරුවලටත් සිංහලුන් රැවටිනි. දැන් සිංහලුන්ට කල හැක්කේ රනිල්-මෛත්‍රී හවුල් රජය බටහිරුන් සහ ඉංදියාව සමඟ එකතුවී මෙරටට කරනදේ බලා හිඳීමය.

මානව හිමිකම් කොමිසම හරහා දියත් කෙරී ඇති දේශපාලණ මෙහෙයුම සාධාරණීකරණය කිරීම සඳහා රජයේ විවිධ පාර්ශවයන් විසින් වමාරන කතන්දර ඒ ඒ බනිස් වලට ඒ ඒ කෙසෙල් ගෙඩි වැනිය. රනිල් වික්‍රමසිංහ මෙරට ව්‍යාපාරික ජනයා හමුවී පවසන්නේ දැන් මෙරටට ආර්ථික සම්බාධක පැනවීමේ තර්ජනයක් නැති බවය. චම්පක රණවකට අනුව පිහිටවීමට යෙදී ඇති දේශීය අධිකරණය හමුවට ඇමෙරිකාවේ රුද්‍රා කුමාරන් මෙන්ම එංගලන්තයේ අදේල් බාලසිංහම්ද කැඳවිය හැකිවා පමණක් නොව මෙරට හමුදාවේ ආත්මගරුත්වය රැකීමට නම් එවැනි යාන්ත්‍රණයක් අත්‍යාවශ්‍යමය. ඒ අතර දෙමළ ගෝලීය සංසදයද දේශීය අධිකරණයට ආශිර්වාද කරමින් කියා සිටින්නේ අතුරුදහන්වූ සිංහල හමුදා භටයින්ටද ඒ හරහා සාධාරනයක් ඉටුකල හැකි බවය. මේ සියල්ල පවසන අතරේ මේ යෝජිත යාන්ත්‍රණයෙන් රණ විරුවන්ට කිසිදු අපහාසයක් හෝ දඬුවමක් හෝ නොකෙරන බවද ඇඟවෙයි.

මේ නන්දෙඩිවිලි වලින් සිතා ගත හැකි එකම කාරණය නම් යුධ අපරාධ විමර්ශණය කෙසේ වෙතත් මෙරට විශාල දේශපාලන වෙනසක් සිදු කිරීම සඳහා රනිල්-මෛත්‍රී හවුල් රජය ඉංදියාව සහ බටහිර ආණ්ඩුවලට සහය දෙමින් සිටින බවය.
 

ඒ බව තහවුරු වන්නේ මානව හිමිකම් කොමිසමට ඇමරිකාව විසින් ගෙනෙන යෝජනාවේ අනුග්‍රාහකයෙකු ලෙස ශ්‍රී ලංකාව ඉදිරිපත්වීමෙනි. දැන් කොමිසමේ කිසි සාමාජිකයෙකුට ඇමෙරිකානු මෙහෙයුමට විරුද්ධ වීමට පදනමක් නැත.

රනිල්-මෛත්‍රී හවුල් රජයත් බටහිරුනුත් තද බල උවමණාවකින් යුතුව මෙරට කරන්නට සැරසෙන දේශපාලන විපර්යාසය කුමක්ද?

මෙරට යුධ හමුදාව අපරාධ සිදුකලේ යැයි බටහිර ආණ්ඩු සිතන්නේ නම් ඔවුන්ට අනුව අපරාධ කරුවන්ට දඬුවම් කිරීම හැර වෙන විසඳුමක් සාධාරණීය නොවේ. නමුත් මේ රජය අඟවන්නේ රණවිරුවන්ට මේ යාන්ත්‍රණයෙන් අගතියක් සිදු නොවන බවය. උදාහරණයක් ලෙසට  අර්ජුන රණතුංග පවසන්නේ වත්මන් රජයේ යම් ක්‍රියාකාරකමක් නිසා මහින්ද රාජපක්‍ෂ සහ ගෝඨාභය රාජපක්‍ෂ යුධ අපරාධ කරුවන් ලෙස නම් නොකෙරෙන බවය. එසේ නම් එම චෝදනා ගෙන ආ බටහිර ආණ්ඩු දැන් මේ යුවල එම චෝදනා වලින් නිදහස් කිරීම සාධාරණීය කරගන්නේ කෙසේද? පැහැදිලිවම බටහිර ආණ්ඩුවල සැබෑ අරමුණ ඊනියා වරද කරුවන්ට දඬුවම් කිරීමටත් එහා යන එකක් විය යුතුය.

අප දකින ආකාරයට ඒ වෙන කිසිවක් නොව  ෆෙඩරල් ක්‍රමයක් මඟින් හෝ වෙනයම් ක්‍රමයක් හරහා ජන වාර්ගික පදනමක් මත මෙරට රාජ්‍ය බලය බෙදා දැමීමය. යුධ අපරාධ විමර්ශණය සිංහලුන්ගේ බලය බිඳීම සඳහා යොදා ගන්න ට්‍රෝජන් අස්වයෙකි.

බලය බෙදීම ව්‍යවස්ථාව වෙනස් කිරීම තුලින් මෙරට නීතියටම අනුව සිදු කෙරෙනු ඇත. ව්‍යවස්ථාව වෙනස් කෙරෙනු ඇත්තේ දෙමුහුන් අධිකරණයක නියායෙන් බටහිර ආණ්ඩු වලට මෙරට නීතිමය කටයුතුවලට මැදිහත්වීමට ලබා දී ඇති ඉඩ කඩ හරහාය. ඊට විරුද්ධ විය හැකි අධිවිනිශ්චය කරුවන් මෙන්ම නීතිපතිවරයාද පළවා හැරෙනු ඇත. බලය බෙදීම හරහා මේ රට සිංහලුන්ගේ රට යැයි තව දුරටත් කිව නොහැකි වන ලෙස සිංහලුන්ගේ දේශපාලන බලය බිඳ දැමෙනු ඇත.  ඉංදියාව හිංදුන්ගේ රට වන පරිදි, ඒංගලන්තය සහ ඇමෙරිකාව ක්‍රිස්තියානි ඇන්ග්ලෝ සැක්සන් වරුන්ගේ රට වන පරිදි ලංකාව සිංහලුන්ගේ රට වීමට බටහිරුනුත් ඉංදියාවත් ඉඩ නොදෙයි. රනිල්-මෛත්‍රී හවුල් රජය බටහිර ආණ්ඩුවලට සහය දක්වන්නේ ඉංදියාවේත් බටහිරුන්ගේත් ඒ උවමණාව ඉටු කරදීම සඳහාය.

මේ ව්‍යාපෘතිය මෙරට ජනතාවට නොදැනී සාර්ථක කර ගැනීමට නම් රණ විරුවන්ට අත නොතැබිය යුතුයැයි රනිල්-මෛත්‍රී හවුල් රජය විසින් බටහිරුන්ට දන්වන්නට ඇති. සමහරවිට බටහිර ආණ්ඩුද රනිල් වික්‍රමසිංහට එසේ නොකරන බවට පොරොන්දුවක් දී ඇති. නමුත් බටහිරුන් ඒ පොරොන්දුවද කඩ කරනු ඇත.

2 comments:

  1. An excellent article!

    The following piece should be translated into Sinhalese and be circulated as widely as possible. Yahapalanayas are certainly going to make a complete sellout of Sri Lanka to the White Christian Western Imperialists! There is surely no doubt that!

    https://thuppahi.wordpress.com/2015/09/25/a-system-change-and-trojan-horse-accepted-by-ranil-sirisena-combo-says-tamara-kunanayakam/



    ReplyDelete