Friday, May 22, 2015

අස්ථාවර දේශපාලනයක නීතියට පැවැත්මක් නැත

ඊනියා යහපාලන ආණ්ඩුව බලයට පැමිණියේ මහින්ද රාජපක්‍ෂ “රෙජිමය” නීතිය හරිහැටි ක්‍රියාත්මක නොකරන්නේය යන කට කථාවක් මතිනි. නමුත් පත්වී ඉතා කෙටි කලකින්ම රටේ නීතිය පිළිබඳව තිබුනාටත් වඩා දැඩි අවිශ්වාසයක් ඊනියා යහපාලන ආණ්ඩුව විසින් නිර්මාණය කර ඇත.

අද පක්‍ෂ විපක්‍ෂ දෙපක්‍ෂයේම දේශපාලඥයෝ මෙරට විනිසුරුවන් ලබාදෙන තීන්දු ප්‍රසිද්ධියේම විවේචනය කරති. නීතියානුකූලව පත්නොවූ අගමැතිතුමාද මෙරට අධිකරන තීන්දු පොදුරාජ්‍ය මණ්ඩලයේ විමර්ශණයට ලක්විය යුතු යැයි පවසයි. අධිකරණ තීන්දු මෙසේ විවේචනය කිරීම අධිකරණය හෑල්ලුවට ලක් කිරීමක්දැයි සාමාන්‍ය ජනතාවට මැන ගත නොහැකිය. මීට පෙර උසාවියට අපහාස කලැයි විපක්‍ෂයේ දේශපාලඥයින් පිරිසක් චෝදනා ලැබූවේ අගවිනිසුරු වරයෙකු පන්නා දැමීමට උද්ඝෝශණය කල නීතිඥයින් පිරිසකට එවැනි චෝදනා නොකෙරනු වාතාවරණයකය. උසාවි ලබාදෙන තීන්දු පිළිබඳව සාමාන්‍ය ජනතාව තුල ඇතිවෙන හැඟීම කුමක්ද? නීතිය ක්‍රියාත්මක කිරීමට පොලීසිය ස්වාධීන කිරීම වෙනුවට දේශපාලඥයින්ගේ අධීක්‍ෂණය යටතේ අපරාධ විමර්ශණ ඒකකයක් පිහිටුවීම මඟින් ප්‍රශ්ණය තවත් සංකීර්ණ කෙරිනි. පැමිණිලි කරුවන් සහ චුදිතයින් බහුතරයක් දේශපාලඥයින්ම වෙන බැවින් දේශපාලඥයින් යටතේ ඇති මෙවැනි ඒකකයක් තුලින් නීතිය ක්‍රියාත්මකවීම පිළිබඳ ජනතාව තුල විශ්වාසයක් ගොඩනැඟිය හැකිද යන්න සැක සහිතය. විශ්වාසය නැතිකල නීතිය පිළිපැදීමක් නැත. පිළිනොපදින විට නීතියට පැවැත්මක් නැත. අද යාපනයේ කාහල කරුවන් පෙන්වන්නට උත්සාහ දරන්නේ තමන් නීතිය පිළිබඳ තැකීමක් නොකරන බව නොවේද?


රටක නීතියක් පවතින්නට නම් එහි ජනතාව නීතියට ගරු කල යුතුය. නීතිය පවතින්නේ නීතිය පොත්වල ලියා තැබුනු නිසාවත් උසාවි තිබුනු පලියටවත් පොලීසියක් තිබුනු පලියටවත් නොව මිනිසුන්තුල නීතියේ සාධාරනත්වය සහ එය සාධාරණව ක්‍රියාත්මක කිරීම පිළිබඳව විශ්වාසයක් තිබෙන නිසාය. ඒ විශ්වාසය නැති තැන නීතියක් නැත. නමුත් නීතිය විසින්ම නීතිය පිළිබඳ විශ්වාසයක් ජනතාව තුල ඇතිකල නොහැකිය. නීතියට තනියම කල හැකි කිසි දෙයක් නැත. නීතිය පිළිබඳ විශ්වාසය ඇති කල හැක්කේ දේශපාලනයටය. දේශපාලනය ඇත්තේ නීතියට ඉහලිනි. (පාර්ලිමේන්තුව අධිකරණය හා විධායකය අතර ඇතැයි සැලකෙන ඊනියා බල බෙදීමක් මේ කථාවට අදාල නැත. ඒවා මේ ආණ්ඩු ක්‍රමයේ අවයවය. මේ ලිපියේ දේශපාලනය සහ නීතිය ගැන කථා කෙරෙන්නේ යම් ආණ්ඩු ක්‍රමයකට සීමාවී නොව සාධාරන වශයෙනි).


අද මෙරට දේශපාලනයේ නොසංසිඳුනු බල අරගලයක් ඇත. ඒ නිසා මෙරට දේශපාලනය අස්ථාවරය. අස්ථාවර දේශපාලනය නීතිය පිළිබඳව ඇතිකරවන්නේ අවිනිශ්චිත බවකි. ඒ අවිනිශ්චිත බව නීතිය පිළිබඳ විශ්වාසයක් ජනතාව තුල ඇතිකරන්නේ නැත. ජනතාව තුල නීතිය පිළිබඳව විශ්වාසයක් නැත යනු රටේ නීතියක් නැතිවීමය.


ඊනියා යහපාලන ආණ්ඩුව විසින් අත්අඩංගුවට ගැනීම් නඩු දැමීම් සහ හිරේ දැමීම් ජයටම කරගෙන යන බව සත්‍යයකි. යහපාලන ක්‍ෂමාලාපකයින් සිතන්නේ තමන් රටේ නීතිය ස්ථාපිත කරන බවය. නමුත් ඒ සියලු ක්‍රියා හුදු නීතියේ අතපය විසි කිරීම්ය. අත පය විසි කිරීම් වලින් පමණක් රටක නීතිය පවත්වාගෙන යා නොහැකිය. නීතිය පවතින්න නම් නීතිය පිළිබඳව විශ්වාසයක් ජනතාව තුල ඇති කල යුතුය. ඒ සඳහා නොසැලෙන දේශපාලන වාතාවරණයක් රට තුල තිබිය යුතුය. නමුත් එවැනි දේශපාලනයක් අද රට තුල නැත. ඊනියා යහපාලන ආණ්ඩුව සහ එය බලයට පත් කල න්‍යායාචාර්ය වරුන් එහි සම්පූර්ණ වගකීම දැරිය යුතුය.


මෙරට අරාජික වීමට ඉඩ නොදිය යුතුය. ස්ථාවර දේශපාලනයකින් රටක නීතියක් පිහිටුවිය හැකි වුනද නීතිය ක්‍රියාත්මක කිරීමෙන්ම රටක
දේශපාලනය ස්ථාවර කල නොහැකි බව අවබෝධ කරගත යුතුය. දේශපාලනය ඇත්තේ නීතියට ඉහලිනි. මුලික වශයෙන් කල යුත්තේ දේශපාලනය ස්ථාවර කිරීමය. ඒ හරහා නීතිය ස්ථාපිත කිරීමය. මෙරට දේශපාලනය ස්ථාවර වීමට නම් විශේෂයෙන්ම සිංහලුන් තුල තමන්ගේ නිදහස රැකෙන බවට හැඟීමක් ඇතිවිය යුතුය. පවතින දේශපාලනය තුල එවැනි හැඟීමක් සිංහලුන්ට ඇති වෙන්නේ නැත.

No comments:

Post a Comment