Tuesday, October 7, 2014

සිල්ලර වෙදකම

හැටේ දශකයේ ගාල්ල පැත්තේ ග්‍රාමීය රෝහලක කලක් සේවය කර දැන් විශ්‍රාම ගොස් සිටින බටහිර වෛද්‍යවරයෙකු වරක් මා සමඟ පැවසූයේ ඒ සමයේ එම රෝහලේ තිබුනේ ඖෂධ වර්ග දෙකක් පමණක් බවත් ඔහුට කල හැකිවූයේ එක් රෝගීන් ඝනයකට එක් ඖෂධයකුත් තවත් රෝගීන් ඝනයකට අනිත්  ඖෂධය දීමත් බවය. ඒ රෝග දෙකටම අයත් නොවුනු රෝගීන්ට කුමණ ඖෂධය දුන්නාදැයි මට අසාගන්නට බැරිවිනි. කෙසේ නමුත් එම රෝහලින් ඵලදායී සේවාවක් ඉටුවුනායැයි කිව නොහැකිය. එසේ වුනද ඒ ගමේ රෝගීන් ඒ රෝහලට ඇදී ආහ.

නිසැකයෙන්ම  එම බටහිර රෝහලෙන් කෙරුනු වෙදකමට වඩා වැඩි යමක් රෝගීන් වෙනුවෙන් කරන්නට එදා ගාල්ල ප්‍රදේශයේ සිටි දේශීය වෛද්‍යවරුන්ට පුළුවන් කමක් තියෙන්නට ඇති. එසේ තිබියදීත් දේශීය වෙදකම ගැන ගැමියන්ගේ තිබුණු විශ්වාසය ඉතා පහසුවෙන් සාධාරන හේතුවක් නොමැතිව බිඳ දමන්නට බටහිර වෛද්‍ය විද්‍යාවට හැකිවුනේ ඊට තිබුණු දේශපාලන ආධිපත්‍යය නිසා විය යුතුය.


එදාට සාපේක්‍ෂව අද වෙනවිට බටහිර වෛද්‍ය විද්‍යාව මෙරට තුල අත්පත් කරගෙන ඇති දේශපාලන බලය අතිමහත්ය.  අද බොහෝවිට රෝගීන් දේශීය වෛද්‍යවරු සොයා යන්නේ බටහිර වෛද්‍ය විද්‍යාවෙන් යම් ලෙඩක් සුව නොවෙන බව පෙනී යන විට පමණි. නමුත් මිනිසුන්, විශේෂයෙන්ම බටහිර සංස්කෘතියේ නොවෙන මිනිසුන්, ඒ කෙරෙහි තබන විශ්වාසයට බටහිර වෙදකමට සාධාරනයක් ඉටු කල හැකිද?


මා කථා කරන්නේ බටහිර වෛද්‍ය විද්‍යා දැනුමට යම් යම් රෝග සුව කිරීමට ඇති හැකියාව හෝ නොහැකියාව හෝ ගැන නොවේ. ඒ බව වැදගත්ය. නමුත් බටහිර වෛද්‍ය විද්‍යාව සායනයේදී රෝගයත් රෝගීයාත් පිළිබඳ පිළිපදින ආචාර් ධර්ම හා ප්‍රතිපත්තිද වැදගත් කොට සැලකිය යුතුය (මේවා බටහිර දැනුමෙන් ස්වායත්ත යැයි ඉන් ඇඟවෙන්නේ නැත). වෛද්‍ය විද්‍යාවේ දැනුමටත් වඩා මේ ආචාර් ධර්ම හා ප්‍රතිපත්ති බටහිර සංස්කෘතිය සමඟ සමීපව සිටමින් සංස්කෘතිය වෙනස්වීමත් සමඟ වෙනස් වේ. ඒ නිසා සංස්කෘතියෙන් බටහිර නොවන මිනිසුන් බලාපොරොත්තු වෙන අන්දමේ සේවයක් බටහිර වෙදකමට ඉටු කල හැකිදැයි යන්න ප්‍රශ්ණයකි.


බටහිර වෛද්‍ය විද්‍යාව බටහිර භෞතික විද්‍යාව අනුගමනය කරමින් වියුක්ත මිනිසෙකු දකියි. ඒ වියුක්ත මිනිසාගේ ක්‍රියාකාරිත්වය තේරුම් ගැනෙන්නේ සංඝටක වලට බෙදා ගෙනය. ඒ අනුව මිනිසාගේ ක්‍රියාකාරිත්වය සංඝටක වල ක්‍රියාකාරකම්හි එකතුවක් ලෙස දකියි. එපමණක් නොවේ ඒ දකින මිනිසා සමාජයෙන්ද වෙන් කෙරේ. බටහිර වෛද්‍ය විද්‍යාවේ ආචාර් ධර්ම හා ප්‍රතිපත්ති වලට මේ විවිධ වෙන් කෙරීම් සෘජුවම බලපායි.


උදාහරණයක් වශයෙන් බටහිර වෛද්‍ය විද්‍යාවට අනුව කෙනෙකුගේ මරණය සිදුවන්නේ මොළයේ සාමාන්‍ය ක්‍රියාකාරිත්වය අත්හිට වුනු විටය. එය සම්මුතියක් මිස යම් මූල ධර්මයකින් පැන නඟින දැනුමක් නොවේ. මරණය එසේ වෙන් කර හඳුනාගත් කල බටහිර වෙදකමට අවසාන වශයෙන් වැදගත් වන්නේ මොනයම් ක්‍රමයකින් හෝ මොළයේ ක්‍රියාකාරිත්වය පවත්වා ගැනීමය. ඒ නිසා එහි සායනයේ ආචාර් ධර්ම හා ප්‍රතිපත්ති හැඩ ගැහෙන්නේ ඒ සඳහාය. නමුත් කෙනෙකුගේ නිරෝගී සම්පත මොළයේ ක්‍රියාකාරිත්වයට ලඝු කල හැකිනොවේ. කෙනෙකුගේ නිරෝගී සම්පත ඒ පුද්ගලයාට පමණක් අදාල ඔහුට පමණක් අයිති ප්‍රශ්ණයකුද නොවේ. නමුත් බටහිර වෙදකමේ අචාර ධර්මවලට ඒ සංකීර්ණකම් දරා ගත නොහැකිය.


සිරුරේ ක්‍රියාකාරිත්වය සංඝටක වලට වෙන් කෙරීම නිසා ඒ ඒ සංඝටක වල රෝගාබාධ පිළිබඳව විශේෂඥ දැනුමක් ඇති බටහිර වෛද්‍යවරු වෙති. නමුත් බොහෝවිට විවිධ විශේෂඥයින් දෙන උපදෙස් ගොනු කරගැනීමට තරම් සාමාන්‍ය මිනිසුන්ට හැකියාවක් නැත. රෝගීන්ට අවශ්‍ය තමන්ට ඇති සියලු ආබාධ ගැන සොයාබලා කටයුතු කරන විශේෂයෙන්ම ඒ ගැන වගකීම ගත හැකි යම් වෛද්‍ය වරයෙකි. නමුත් බටහිර වෛද්‍ය විද්‍යාවේ අචාර ධර්ම සහ ප්‍රතිපත්ති වැදගත්කමක් දෙන්නේ විශේෂඥ දැනුමට මිස සමස්ථ දැනුමට නොවේ.
අනුව අවසානයේ රෝගියා තමාගේම වෛද්‍යවරයාද වන්නට සිදුවේ.

බටහිර වෛද්‍ය ප්‍රතිකර්ම වලින් බොහෝවිට රෝග නිට්ඨාවටම සුව වේ යැයි සැලකෙන්නේ නැත. එහි කෙරෙන්නේ රෝග තත්ව කළමණාකරනයකි. ඒ නිසා එකම ආබාධය වුවද විවිධ තත්ව යටතේ විවිධ ආකාරවලට කළමණාකරගැනීමට පුළුවන. යම් ප්‍රතිකර්මයකින් යම් රෝගයක් නිට්ඨාවටම සුවවේ නම් කල යුත්තේ ඒ ප්‍රතිකර්මය බවට විවාදයක් නැත. නමුත් රෝගය විවිධ ආකාරවලට කළමණාකර ගැනීමට හැකිවන විට පිලිපැදිය යුත්තේ ඉන් කුමණ ආකාරයද යන්න ප්‍රශ්ණයක් බවට පත්වේ. බටහිර අචාර ධර්මවලට අනුව ඒ තෝරා ගැනීම කල යුත්තේ රෝගියා මිස වෛද්‍යවරයා නොවේ. බටහිර සංස්කෘතියට එය ප්‍රශ්ණයක් නොවන්නේ එහි මිනිසුන් සමාජයෙන් ස්වායත්තව වැඩ කරන බැවිනි. නමුත් වෛද්‍යවරයාත් රෝගියාත් ඔහුගේ නෑ හිත මිතුරනුත් බැඳුනු සමාජයකට ඒ ආචාර ධර්ම ගැලපෙන්නේ නැත.


බටහිර වෙදකමේ අචාර ධර්ම හා ප්‍රතිපත්ති සිංහල බෞද්ධ සංස්කෘතිය හා සමපාත නොවෙන බව පැහැදිලිය. බටහිර සංස්කෘතියත් සමඟ වෙනස් වෙමින් පැමිණ අද වෙන විට බටහිර වෙදකම කඩේ සබන් විකුණනවා හා සමාන සිල්ලර වෙළඳාමක් බවට පත්වී ඇත.  රෝගීන්
එහි සබන් තෝරන පාරිභෝගිකයින් මෙනි. මෙරට බටහිර වෛද්‍යවරුන් කෙතරම් සිංහල බෞද්ධ සංස්කෘතියට අනුව හැඩ ගැහුනද ඔවුන්ට බටහිර වෙදකමේ ආචාර ධර්ම වලින් සම්පුර්ණයෙන්ම ගැලවිය නොහැක්කේ ඒවා බටහිර වෛද්‍ය විද්‍යාවෙන් ස්වායත්ත නොවන නිසාය. අපිද බටහිර සංස්කෘතියට අනුව හැඩ නොගැසුනොත්  බටහිර වෙදකම මෙහි පවත්වාගත හැකිවන්නේ දේශපාලන බලයෙන් පමණි.

3 comments:

  1. ආයුර්වේද නාමය (වෙදකම නොවේ) අද ස්පා හරහා ඉතාමත් අභාග්‍ය සම්පන්න ඉරණමක් කරා ගමන් කරනවා. මේ සම්බන්ධව නිසි කතිකාවක් ඇතිවන්නේ නැහැ.

    ReplyDelete
  2. eththenma Spa nisa Aurwedayta thibunu wishasaniya bawa nethiwela,Lankawa purama,Aurwedaya wikunan kanawa,wisheshayenma Ayurwedaya gena wiswasa karala ena europiyayanta,enisa owun thula thibu Gawrawaya giliheminyanawa.Pradanama ekak thami spice Garden karana Gasakem(Hemathenama nowe)

    ReplyDelete
  3. මේදවස්වල Indian Hospital documentary එක බලනවා. බැලුවේ නැත්නම් බලන්ට...මෙන්න ලින්ක් එක.
    https://www.youtube.com/watch?v=QGr_5yA3rIk

    ReplyDelete