Monday, March 17, 2014

බටහිරෙන් හිරු බැස ගියාදෙන්

අද යුක්රේනය මැදි කරගෙන බටහිර රටවල් සහ රුසියාව අතර ඇතිවී ඇති ගැටුම හුදෙක් පුටින්ට හෝ ඔබාමාටවත් ඒ ආණ්ඩුවලටවත් සම්පූර්ණයෙන්ම පාලනය කල හැකි බවක් පෙනෙන්නට නැත. එපමණක් නොවේ සිරියාවේ ඊජිපත්තුවේ වෙනිසියුලාවේ ආදී රටවල පවතින ගැටුම්ද ඒ ඒ ආණ්ඩුවල ක්‍රියාකාරිත්වයට ඔබ්බෙන් යන පොදු සමාජ අරගල ලෙස පෙනේ. ඒ කොතැනත් ඇති පොදු අරගලය වෙනකක් නොව යුදෙව් ක්‍රිස්තියානි සංස්කෘතිය සහ යුදෙව් ක්‍රිස්තියානි නොවන මුස්ලිම් හෝ කතෝලික සංස්කෘති අතර ඇති අරගලයයි. බටහිර ආණ්ඩු මේ නොයෙකුත් වේදිකාවල යුදෙව් ක්‍රිස්තියානි සංස්කෘතිය වෙනුවෙන් පෙනී සිටමින් යටි උගුල් කුමන්ත්‍රණ දියත් කරන බව රහසක් නොවේ. යුක්රේනයේද රුසියාවට හිතවත්වූ යනකොවිච් පන්නා දැමීමට උගුල් ඇද්දේ බටහිර ආණ්ඩු බව පැහැදිලිය. නමුත් මේ හැම තැනකම රඟ දැක්වෙන සටන් හුදෙක් බටහිර ආණ්ඩු විසින් ඒ ඒ රටවල් මර්ධනය කර ගැනීමට දරන උත්සාහයක් නොව පොදුවේ යුදෙව් ක්‍රිස්තියානි සංස්කෘතිය තම ආධිපත්‍ය රැක ගැනීමට දරන උත්සාහයක් ලෙස දැකිය හැකිය.

මේ වෙනවිට යුදෙව් ක්‍රිස්තියානි සංස්කෘතියට පෙර නොවූ තර්ජනයක් ලොව පුරා බටහිර නොවන සංස්කෘති වලින් එල්ල වෙමින් පවතී. ඒ තර්ජන හමුවේ වසර සිය ගණනක් හිරු නොබැසි බටහිර අධිරාජ්‍යයේ දැන් හිරු බසිමින් පවතී. ඒ බව තවමත් හරි හැටි නොපෙනෙන්නේ යුදෙව් ක්‍රිස්තියානි සංස්කෘතිය තවමත් බටහිර ආණ්ඩුවල යුද ශක්තිය ආධාරයෙන් හිස ඔසවා සිටින බැවිනි. නමුත් යුද ශක්තියෙන් පමණක් බටහිරුන්ට තම ආධිපත්‍යය රැක ගැනීමට හැකි නොවනු ඇත.

යුදෙව් ක්‍රිස්තියානි සංස්කෘතිය තම ආධිපත්‍යය ගොඩනැඟුවේ ආර්ථික දේශපාලණික හා සාමාජික ක්‍ෂේත්‍ර තුල සියල්ලන්ට සාධාරණය වන, නැත්නම් සියලු සංස්කෘතිවලට පොදුවූ ඊනියා ප්‍රවාද නැත්නම් කතන්දර ගොඩනඟමින් ඒ කථා අන් සියලු සංස්කෘතිවලට බලයෙන් පිලිගැන්වීමට සැලස්සවීම තුලිනි. (අද ලොව පුරා මුදල් ගණුදෙනු වලට ඇමෙරිකානු ඩොලරය පාවිච්චි වෙන්නේ යම් ස්වභාවික සංසිද්ධියක් නිසාද?) කෙසේ වෙතත් මේ ඊනියා සාධාරණ කෙරීම් හරහා ඔවුහු ඒ ඒ රටවල ඊට පෙර නොතිබුනු ආර්ථික දේශපාලණික හා සාමාජික ප්‍රශ්ණ ඇති කලහ. නමුත් මේ එකකටවත් සෑහීමකට පත්විය හැකි විසඳුම් යුදෙව් ක්‍රිස්තියානි සංස්කෘතියට නැත. යුදෙව් ක්‍රිස්තියානි සංස්කෘතියේ ආධිපත්‍යය බිඳ වැටන්නේ ඒසංස්කෘතිය විසින් ඇතිකල ප්‍රශ්ණ වලට ඊට විසඳුම් නැති බැවිනි. දැන් දැන් අන් සංස්කෘති වල ජනයා යුදෙව් ක්‍රිස්තියානි සංස්කෘතියට තමන්ගේ ප්‍රශ්ණ චිසඳිය නොහැකි බව අවබෝධ කරගනිමින් සිටිති. අද යුක්රේනයේත් සිරියාවේත් ඊජිපත්තුවේත් වෙනිසියුලාවේත් බටහිර නොවන අන් රටවලත් කෙරෙන සමාජ අරගල වල යටින් දිවෙන්නේ ඒ ඒ සංස්කෘති විසින් වැඩ බැරි යුදෙව් ක්‍රිස්තියානි සංස්කෘතිය ප්‍රතික්‍ෂේප කිරීමට දරන උත්සාහයත් බටහිර ආණ්ඩු විසින් එය බලයෙන් පැටවීමටත් දරන උත්සාහයත් අතර ඇති සටනය. තම ප්‍රශ්ණ තම සංස්කෘති තුල අවබෝධ කරගෙන ඒතුලම විසඳාගත හැකි බව අවබෝධ කරගන්නා විට මෙලොව බහුතරයක් සමාජ යුදෙව් ක්‍රිස්තියානි සංස්කෘතිය ස්වේච්ඡාවෙන්ම අත හැර දමනු ඇත. ඒ අත්හැරීම තුල යුදෙව් ක්‍රිස්තියානි සංස්කෘතියට තවදුරටත් ආධිපත්‍යයක් පවත්වා ගැනීමට නොහැකි වනු ඇත. එහිදී යුධ බලයෙන් කල හැකි දෙයක් ඉතිරි නොවෙනු ඇත.



ජිනීවා කෝලමෙහිද දැකිය හැක්කේ සිංහලුන් විසින් යුදෙව් ක්‍රිස්තියානි සංස්කෘතිය ප්‍රතික්‍ෂේප කිරීමට දරන උත්සාහයත් බටහිර ආණ්ඩු විසින් එය බලයෙන් සිංහලුන් මත පැටවීමටත් දරන උත්සාහයත් අතර ඇති සටනකි. පැහැදිලිවම ශ්‍රී ලංකාවේ දේශපාලනය සම්බන්ධයෙන්වත් ලෝක දේශපාලනය සම්බන්ධයෙන්වත් පිළිගත හැකි සාධාරණ (පොදු යන අර්ථයෙන්) කථාවක් හෝ ස්ථාවරයක් බටහිරුන්ට නැත. බටහිර ආණ්ඩු අද ක්‍රයිමියානුන් යුක්රේනයෙන් වෙන්වනවාට විරුද්ධය නමුත් ඔවුහු ඊළමුන්ට විරුද්ධ නැත. ඔවුහු සුඩානය හා යුගොස්ලාවියාව දෙකඩ කිරීමට කටයුතු කලහ. මේ දෙකඩ කිරීම් සහ ඊට විරුද්ධවීම් යන පරස්පර ක්‍රියාවල් සාධාරණය කල හැකි පොදු දේශපාලන විද්‍යා කථාවක් බටහිරුන්ට නැත. ඊනියා මානව හිමිකම් කථාව බොරුවක් බව ලොවම දනිති. එහි ප්‍රශ්ණය බටහිරුන් මානව හිමිකම් නොරැකීම පමණක් නොවේ. ඔවුන්ට ඒ සංකල්පය සංගත ආකාරයකට බටහිර දේශපාලන විද්‍යාවේ යොදා ගැනීමටද නොහැකිය. මානව හිමිකම් කඩ කලැයි අප රටට චෝදනා එල්ල කලද දෙමළ ජාතිවාදයට අවශ්‍ය පරදි දේශපාලන බලය හිමිවේ නම් ඒ චෝදනා අස් කරගැනීමට බටහිරුන් එකඟය. මෙහි ඇති පරස්පර විරෝධී බව නොපෙනෙන්නේ ගැත්තන්ට පමණි. පරස්පර විරෝධී කථා බුද්ධිමය සංවාදයකදී පරාජය විය යුතුය.

බටහිරුන්ට දේශපාලන අධිපති බවක් ලබෙන්නේ ඔවුන්ගේ දේශපාලන කථා සෙසු ලෝකයා පිලිගන්නා තාක් කල් පමණි. නමුත් තමන් ගොතන බොරු කතන්දර වලට එතරම් ආයුෂ නැති බව බටහිරුන්ද වටහා ගෙන ඇති බවට සැකයක් නැත. ඒ නිසා ඔවුන් උත්සාහ කරන්නේ හැකිතාක් දුරට අපි ඔවුන්ගේ කථා තුල රඳවා ගැනීමටය. නැත්නම් බැඳ තැබීමටය. මානව හිමිකම් කොමිසම අපට මානව හිමිකම් පිළිබඳව අභ්‍යන්තර පරීක්‍ෂණයක් කරන්නට යැයි දැන් කියන්නේ කෙසේ හෝ අප මේ බොරුවේ තවදුරටත් බැඳ තබා ගැනීමට අවශ්‍ය නිසාය. නමුත් පරස්පර විරෝධී අසංගත දේශපාලන කථා වලට ඇති බැඳීම් අපි විසින් අත් හල යුතුය. අපි බටහිර ආධිපත්‍යයෙන් නිදහස් වෙන්නේ එවිටය. යුදෙව් ක්‍රිස්තියානි සංස්කෘතියට ප්‍රශ්ණ විසඳිය නොහැකිය. ඔවුන්ගේ අධිරාජ්‍යයේ හිරු බසින්නට ඉඩ හැර අපි අපේ අතක් බලා ගත යුතුවෙමු.

No comments:

Post a Comment