Friday, November 29, 2013

නිදහසේ මුල් පියවර තබමු

ලක්‍ෂ ගණන් මුදල් වැය කර ඊනියා ජාත්‍යාන්තර පාසල්වල ඉංග්‍රීසියෙන් අධ්‍යාපනයක් ලබා ලංඩන් උසස් පෙළ විභාගයට පෙනී සිටියද බහුතරයකට ලංඩනයේ හෝ වෙනත් විදේශයක උසස් අධ්‍යාපනය ලබන්නට අවස්ථාවක් ලැබෙන්නේ නැත නමුත් මෙරට දරුවන්ට දේශීය අධ්‍යාපනයක් ලැබීමට නිදහසක් නැත. වකුගඩු රෝගයකින් මිනිස්සු දහස් ගණන් මිය ඇදෙති. එය සුව කිරීමට බටහිර වෛද්‍ය විද්‍යාවට නොහැකිය නමුත් කෘෂි රසායන භාවිතයෙන් තොර ගොවිතැනක් කිරීමට අපට නිදහසක් නැත. හෘදයාබාද පිළිකා මානසික රෝග වැනි නොයෙකුත් ව්‍යාදීන්ට පිළියමක් නැත නමුත් මස් කිරි පාන් නොකා විශ නැති පරිසරයක ජීවත්වීමට අපට නිදහසක් නැත.

නිදහස නැති නිසා ඇති වෙන ප්‍රශ්ණ නිදහස් නොවී විසඳාගත නොහැකිය. අපි අපේ ප්‍රශ්ණ විසඳාගැනීමට නම් පවතින බටහිර දේශපාලන හා ආර්ථික ක්‍රමයට පිටූපා අඩුතරමින් අපට සුදුසු දේශපාලන හා ආර්ථික ක්‍රමයක් තනා ගත යුතුවෙමු. ඒ සඳහා ගතයුතු මූලික පියවර ගැන අද අපට හැඟීමක් ඇත.


අපි පවතින්නේ අපත් ලෝකයත් අතර ඇති අන්‍යෝන්‍ය සම්බන්ධකම නිසාය. එවැනි අන්‍යෝන්‍ය සම්බන්ධකමක් පවත්වාගත හැක්කේ කුඩා සමාජ ඒකක තුලය. ගම එවැනි ඒකකයකි. අන්‍යෝන්‍ය සම්බන්ධකම පදනම් කරගෙන සියල්ලටම සෑහීමකට පත්විය හැකි තීරණවලට එලඹීමට ගම් සභාවක් තුල හැකියාවක් ඇත. මහා සම්මතවාදය යනු එයයි. ගම් කිහිපයක නියෝජිතයින් පිරිසක් ඊට ඉහල ඒකකයකට අයත්වේ. ග්‍රාම නියෝජිතයින් අතරද තිබිය යුත්තේ අන්‍යෝන්‍ය සම්බන්ධකමකි. ඒ සම්බන්ධකම උඩ ඒ ඒකකය තුලද මහා සම්මතවාදයෙන් තීරණ ගත හැක. මේ ආකාරයට ක්‍රමයෙන් වඩෙන සමාජ ඒකක අතුරින් ඉහලම තලයේ ඒකකය ජාතියයි. ජාතික තලයේ ගන්නා තීරණ ක්‍රමයෙන් පහල තල මත පැටවෙන්නේද මහා සම්මතවාදයෙනි. මේ දේශපාලන ක්‍රමය තුල කේන්ද්‍රගත බවක් මෙන්ම විමධ්‍යගත බවක්ද ඇත. අපට සුදුසු මෙවැනි දේශපාලණ ව්‍යුහයකි. නමුත් අද බලය විමධ්‍යගත කිරීමට නොහැකිය. මන්ද දෙමළ හා මුස්ලිම් නායකයින් ඒ හරහා අසමමිතික දේශපාලන බලයක් නැගෙනහිර හා උතුරු පළාත්වල ගොඩනඟා ගන්නා බැවිනි. තවමත් දෙමළ සංධානය ප්‍රභාකරන් වීරයෙකු ලෙස සමරන්නට උත්සාහ දරයි. ඒ මාර්ගයෙන් රටේ සතුරෝ රට බෙදීමටත් රාජ්‍යය දුබල කිරීමටත් ක්‍රියා කරති. අපට අද මහා සම්මතවාදීව බලය කේන්ද්‍රගත කිරීමටද නොහැකිය. මන්ද දෙමළ සහ මුස්ලිම් ජනයා සිංහල දේශපාලකයින්ට අවනත නොවෙන බැවිනි. සියලු ජන කොටස්වලට නායකත්වය දිය හැකි ජාතික මට්ටමේ නායකයින් අද අප අතර නැත.


මහා සම්මතවාදී ආණ්ඩු ක්‍රමයක විමධ්‍යගතබව රැක ගන්නට නම් නිජ බිම් දේශපාලණය අහෝසි කර දැමිය යුතුය. එම ආණ්ඩු ක්‍රමයේ කේන්ද්‍රීයබව රැක ගන්නට නම් සිංහල දෙමළ හා මුස්ලිම් ජනයා එක් ජාතියකට අනුකලණය විය යුතුය. එකක් නිසා අනිකද ඉටුවෙන බව පැහැදිලිය. මේ අනාගතයේ අප බලාපොරොත්තු වෙන දේශපාලණ වතාවරණයකි. මේ දේශපාලණ වතාවරණය ඇතිකර ගතහැක්කේ ශක්තිමත් දේශපාලණ ව්‍යාපාරයක් මතිනි. වාසුදේව නානායක්කාර මහතාගේ සමාජ ඒකාබද්ධතා අමාත්‍යංශයෙන් නම් කෙදිනකවත් එය අත් කර ගත නොහැකිය. ඒ සඳහා  කැපවුනු රාජ්‍ය නොවෙන නමුත් රජයේ අනුග්‍රහය ඇති රජය උපදෙස් ලබන ජාතික සංවිධානයක් පිහිටවිය යුතුය. එම සංවිධානය මඟින් එක ජාතියක් ඒකීය රටක් යන තේමාව යටතේ තරුණ දෙමළ මුස්ලිම් හා සිංහල දේශපාලඥයින් පිරිසක් එකතු කර ඔවුන් හරහා ජන මතය මෙහෙයවිය යුතුය. එමඟින් වාර්ගික දේශපාලනය අවතක්සේරුවට ලක් කල යුතුය.


නිජ බිම් දේශපාලණය ජාතික සමගියට එරෙහි වේ. ඒ නිසා කිසිම ජාතියකට හෝ ආගමකට හෝ අයත් ජන කොටසකට රටේ තෝරාගත් ප්‍රදේශයක් තම නිජ බිම ලෙස සලකා දේශපාලණය කිරීම, ඒ ආකල්ප ප්‍රවර්ධනය කිරීමේ අරමුණින් පක්‍ෂ සංවිධාන කරගැනීම නීති විරෝධී කල යුතුය. යටත් විජිතවාදීන් විසින් මෙරට ජන සංයුතියේ සිදුකල වෙනස ජාතික සමගියට බාධාවක් ලෙස සලකා එය නිවැරදි කිරීම සඳහා රාජ්‍ය ප්‍රතිපත්තියක් නිර්මාණය කර ගත යුතුය. ඒ අනුව පුරවැසියයෙකුට රටේ ඕනෑම තැනක ජීවත්වීමට ඇති බාධා ඉවත් කල යුතුය. මුලු රටේ ජනවර්ග අනුපාතයට වඩා අතිශයෙන් වෙනස් ජන අනුපාතයක් ඇති ප්‍රදේශවලට ඒ වෙනස අවම කිරීම උදෙසා ජන සංක්‍රමණයක් සිදුවිය යුතුය. එවැනි සංක්‍රමණයක් ස්වේඡාචාවන් සිදුවීමට අවශ්‍ය උත්තේජන සැපයිය යුතුය. උදාහරණයක් වශයෙන් රජයේ රැකියා ලබාදීමේදී දකුනේ වෙසෙන සිංහලයෙකුට උතුරේත් උතුරේ දෙමළ ජාතිකයෙකුට දකුනේත් ප්‍රමුඛතාවය හිමිවිය යුතුය. ඔවුන්ට සංක්‍රමණයවීම සඳහා මුල්‍යාධාර ඉඩ කඩම් සපයා දිය යුතුය. එවැනි සංක්‍රමණිකයින්ගේ දරුවන්ට පාසල් වලට ඇතුලත් කිරීමේදී ඔවුන්ට ප්‍රමුඛතාවක් හිමිවිය යුතුය. එමෙන්ම ජන සංයුතියේ වෙනසක් කල හැකි ව්‍යාපාර සංක්‍රමණයවීම සඳහාද බදු සහන ණය ආධාර වැනි උත්තේජන සැපයිය යුතුය.


දේශීය ආර්ථිකයේ ව්‍යුහය විමධ්‍යගත විය යුතුය. ඒ අනුව ගම් හැකිතාක් දුරට ස්වයංපෝෂණය විය යුතුය. ගමේ පිරිමසා ගත නොහැකි අවශ්‍යතා ගම් එකතුවී සැදෙන ඊලඟ පරිපාලන තලය තුල මත සිදුවෙන වෙලඳ හුවමාරු තුලින් ඉටු කර ගත යුතුය. එහිදී පිරිමසා ගත නොහැකි අවශ්‍යතා ඊට ඉහල තලයේ සිදුවිය යුතුය. මේ අකාරයට රටේ වෙලඳ ආර්ථිකය දේශපාලන ව්‍යුහය හා සමපාත විය යුතුය. අද අප කල යුත්තේ ආර්ථිකයේ විමධ්‍යගත භාවයක් ඇති කිරීමට ගත හැකි පියවර සොයා බලා එය ක්‍රියාත්මක කිරීමය. උදාහරණයක් වශයෙන් දැනටමත් යෝජනාවී ඇති රට පුරා සුපිරි පාසල් පිහිටුවීමේ වැඩපිළිවෙල ක්‍රියාත්මක කල යුතුය.

3 comments:

  1. නොකරන එක නේ කරුමේ. දැන් කොයි කාළෙක ඉඳන්ද කියන්නේ. පටන් ගත්තා නම් ඒ පොඩි උන් දැන් 6 පන්තියේ. (සමාවෙන්න 7 වසරේ.)

    ReplyDelete
    Replies
    1. ඔව් අපි යුද්දෙ දිනුවායින් පස්සේ කල යුතු දේවල් ගැන හිතලා තිබුනේනෑ. නමුත් ඉතිං දැන් හරි මේවා කරන්න පරක්කු නැහැ

      Delete
  2. බටහිර ගැති බමුණු කුලයක් සහ ඉහලම ප්‍රතිලාබ ලබන පාසල් වටා ගොඩනගාගත් බමුණු කුලයන් ආදී නොයෙක් හේතුන් සහ ලාබයන් වටා ගොඩනගාගත් මනොරජයන්හි වැජබෙන අපේ පඩියන් ඔවුන්ගේ බලය ගිලිහි යන මෙවැනි ක්‍රමවේදයන්ට අවකාශ ලබා දේ යයි ඔබ සිතන්නේද?

    ReplyDelete